И покрај тоа што вирусот на мајмунски сипаници речиси исклучиво засега одредена популација на луѓе, Белата куќа соопшти дека „секој Американец“ треба да го сфати сериозно. Како резултат на тоа, американската администрација во четвртокот прогласи вонредна здравствена состојба во јавното здравство поради појавата на оваа болест.
Секретарот за здравство Ксавиер Бесера издаде изјава за време на брифингот, велејќи им на новинарите дека Белата куќа го повикува „секој Американец сериозно да ги сфати мајмунските сипаници“. Со прогласување вонредна состојба, администрацијата на Бајден може да пристапи до повеќе средства за одговор на болеста, на пример со купување дози на вакцини или третмани од фармацевтски фирми.
Светската здравствена организација ги прогласи мајмунските сипаници за „вонредна здравствена состојба од меѓународна загриженост“ кон крајот на минатиот месец, едно ниво под статусот на пандемијата доделен на Ковид-19. Во САД, градовите Сан Франциско и Њујорк веќе прогласија вонредни состојби во јавното здравство поради појавата, како и сојузните држави Њујорк и Илиноис.
Повеќе од 6.000 случаи на мајмунски сипаници се пријавени во САД од мај, а огромното мнозинство се јавува кај геј мажи. Иако сè уште не е јасно дали вирусот се шири сексуално или преку продолжен контакт вклучен во сексуален однос, директорот на СЗО, Тедрос Аданом Гебрејесус, минатиот месец рече дека мажите „со повеќе сексуални“ партнери од ист пол се особено изложени на ризик.
Најмалку четири деца во САД се заразени со вирусот, според државните и федералните власти.
Фото: YOUTUBE/SCREENSHOT/GUARDIAN NEWS/SHUTTERSTOCK/RARRARORRO