Познатиот дански актер Мадс Микелсен денеска пристигна во Сараево на тамошниот филмски фестивал.
Пред свечената церемонија и црвениот тепих пред Народниот театар, познатиот актер гостуваше кај градоначалничката на Сараево, Бенјамина Кариќ, а потоа отиде на ќебапи со Златко Буриќ – Кич, актер и изведувач, еден од основачите на познатиот „Kugla glumište“.
Додека публиката се собра пред Народниот театар и трпеливо го чекаше пристигнувањето на Микелсен, тој на Фејсбук објави фотографија со Златко Буриќ, со кого играше во средината на деведесеттите во филмот „Pusher“.
Буриќ беше еден од основачите на мултимедијалната компанија „Kugla glumište“, која работеше во поранешна СФРЈ од 1975 до 1982 година. Од 1983 година Буриќ живее во Данска, каде настапува на локалната уметничка сцена со различни проекти, а доби и награда за дебитантската улога во филмот „Pusher“ на Николас В. Рефен.
Данскиот актер Мадс Микелсен, како што е најавено, денеска во 18 часот и 15 минути ќе се најде на црвениот тепих на 28. Сараевски филмски фестивал пред Народниот театар.
Вечерва во 20 часот и 30 минути во Летното кино ќе биде прикажан филмот „The Hunt“ на Томас Винтенберг во кој главната улога ја има Микелсен, а пред проекцијата ќе му биде врачена наградата „Почесно срце на Сараево“.
Микелсен е добитник на „Почесното срце на Сараево“ на 26. Сараевски филмски фестивал (2020 година), на кој поради околностите предизвикани од пандемијата на коронавирусот, не можеше да присуствува.