Заврши одморот на пратениците.
Јован Митрески, координатор на пратениците од СДСМ информираше дека од ВМРО-ДПМНЕ не дошле на координацијата со претседателот на Собранието, Талат Џафери.
-Пратеничката група на ВМРО-ДПМНЕ одби да присуства на денешната координација кај претседателот на Собранието. Се надевам дека ќе се промени овој однос.
Не сакам да верувам дека во ВМРО-ДПМНЕ не ја научиле лекцијата, ниту дека не ја примиле пораката од граѓаните.Повикувам опозицијата да ги научи лекциите од минатото и наместо блокади и деструкции да делуваат конструктивно и одговорно. Тоа е во интерес на сите граѓани.Наместо активна и пасивна блокада, одолговлекување на пленарните заседанија и седниците на собраниските комисии, навредување и попречување на работата, потребен е функционален и ефикасен парламент, вели Митрески.
Тој уште еднаш напомена дека не треба да се дозволи да се повтори она што се случувало во собранието, „неразумни опструкции, блокади на важни закони за граѓаните, одолговлекување на пленарните заседанија и седниците на собраниските комисии“.
-Особено да не ни се повтроат сцените со навреди и попречување на дискусиите на пратениците на едно ниско, недемократско ниво кое не ни доликува и кое не донесе ништо, најмногу загуби ВМОР-ДПМНЕ во очите на граѓаните.Се покажа дека ниту една деструкција, блокада или опструкција не може да даде со плод, само се губи време и се трошат пари на граѓаните.Парламентарното мнозинство е тука за граѓаните, остануваме посветени на работата и имплементација на ветувањата пред граѓаните и политиките, смета координаторот.
Координаторот на пратеничката група на ВМРО-ДПМНЕ, Никола Мицевски вечерва изјави дека пратениците од најголемата опозициска партија ќе продолжат со работа во Собранието како и досега.
-А тоа е да го спречиме непродуктивното и нефункционалното работење на Собранието. Очекуваме Собранието во наредниот период да ги надмине „детските болести“, а тоа е непринципиелно толкување на Деловникот и дека ќе се намалат бројните уцени на владеачкото мнозинство, затоа што видовме како заврши последната пленарна седница рече Мицевски.
Тој појасни дека не одат на координации од мај месец.
-Претходно не одевме и на почетокот на мандатот и тоа не е ништо ново. Видовме дека одењето на координации е беспредметно. Не ја гледаме потребата да присуствуваме некаде кога по завршување на координацијата, владеачкото мнозинство прави дополнителни сами координации меѓу себе и договараат што ќе се работи, рече Мицевски во Дневникот на Тв Сител и додаде:
-ВМРО-ДПМНЕ активно ќе учествува на сите седници со активна блокада на Собранието.