Министерството за одбрана на Србија соопшти дека воената обука на српските вооружени сили се одвива во копнената безбедносна зона, која се наоѓа долж границата со Косово.
„Обуката се спроведува со цел да се одржи висок степен на борбена готовност на ангажираните единици и нивната способност брзо да реагираат во случај на потреба и да се обезбеди мир и безбедност на административната линија со Автономната покраина Косово и Метохија“, објави Министерството вчера.
Како што се наведува понатаму, посебно внимание се посветува на „вежба на борбени дејствија во случај на напад на единицата, како и тактики, техники и процедури кои се користат за спречување на нелегални преминувања, активности на екстремистички групи и организиран криминал“.
Во соопштението се додава и дека војската на Србија во текот на целата година спроведува обука во Копнената безбедносна зона, како пред распоредувањето, така и за време на извршувањето на задачите во копнената безбедносна зона.
Ова, како што се наведува, „обезбедува високо ниво на способност за одговор на сите предизвици, ризици и закани во областа на нивната одговорност“.
Од 1 септември граѓаните на Косово за првпат можат целосно слободно да влезат на територијата на Србија, односно повеќе нема да им се издаваат влезно-излезни документи кои ги заменуваат нивните лични карти.
Исто така, Косово нема да издава такви документи на граѓаните на Србија.
Укинувањето на документите за влез/излез беше договорено на 27 август меѓу Косово и Србија како дел од дијалогот за нормализација на односите, откако на тоа инсистираа европските и американските посредници.
Договорот уследи по ескалацијата на односите меѓу двете земји, при што беа подигнати барикади на патиштата на северот на Косово и по обидот на властите да воведат реципроцитетна мерка на документите за влез-излез, како и пререгистрација на косовски возила од таблички издадени од Србија на РКС – Република Косово.