Рускиот претседател Владимир Путин изјави дека Русија е подготвена да испрати повеќе од 300.000 тони руско ѓубриво заглавено во европските пристаништа до земјите во развој, доколку Европа се согласи дополнително да ги ублажи санкциите за рускиот извоз.
Во рамките на својот говор на самитот на Шангајската организација за соработка во Узбекистан, Путин рече дека Европа само „делумно“ ги укина санкциите кои, според Русија, ја спречуваат продажбата и дистрибуцијата на руски ѓубрива низ светот.
Тој исто така изјави дека Русија ја поздравува одлуката на Европската унија за олеснување на некои логистички санкции за рускиот извоз, но и ја осуди ЕУ дека се однесува „себично“ со укинување на санкциите само кога станува збор за нејзините членки.
„Само тие можат да ги купат нашите ѓубрива. А што е со земјите во развој и најсиромашните?“, праша Путин на самитот.
Како дел од договорот со Украина, Турција и ОН постигнат во јули, на Русија ѝ беше дозволено да ги продава своите ѓубрива на глобалниот пазар, но мораше да ја укине блокадата на јужните украински поморски пристаништа и да и дозволи на Украина да извезува жито.
Путин рече дека моментално има околу 300.000 тони ѓубриво во европските пристаништа, кои Русија е подготвена бесплатно да ги испрати во земјите во развој кога ќе бидат укинати санкциите.