Претседателот на Република Србија, Александар Вучиќ денеска говорел на церемонијата на пуштање во употреба на гасниот интерконектор Бугарија-Грција.
Вучиќ изјавил дека Србија ќе продолжи да го диверзифицира снабдувањето со гас и други енергетски производи.
– Ќе изградиме интерконектори меѓу нас и Северна Македонија и Бугарија, за да можеме да се поврземе на таа линија ТАП. Размислуваме и за други енергетски проекти, нови гасоводи на територијата на Србија, но и за нафтени линии. Гледам дека некои се фалат дека ни прават голема услуга со тоа што им плаќаат многу пари за транзит на нафта, а и ние ја диверзифицираме, вели тој.
Вучиќ посочува дека овие работи се од стратешко значење за нивната земја и дека до средината на следната зима ќе имаат повеќе диверзифицирани извори на гас отколку претходно.
– Ситуацијата е тешка, како што слушнавте. Не го криев тоа, иако Урсула фон дер Лајен беше поголем оптимист. Видовте дека барав пред сите и земјите од Западен Балкан да добијат средства за покривање на огромните цени на струјата што ги плаќаме. Само благодарение на добрата состојба на нашите финансии ќе ја преживееме оваа зима. И што ќе правиме следната зима? Се трудиме и работиме, ќе зборувам повеќе за тоа на 8 октомври, најавил претседателот.
Тој рече дека Бугарија сега ќе има многу подобра ситуација бидејќи ќе добива течен гас од Грција и Азербејџан.
– Бугарите добро си ја вршат работата. Што се однесува до нас, се е важно. Не знаев дали да плачам или да врескам кога видов што се случи на Северен тек 2. Сега замислете тоа да се случи некаде во Црното Море и да ни снема бензин. Замислете да не го изградиме гасоводот што го имаме, сега би можеле да им кажеме на луѓето дека нема да имаат струја 12 часа на ден, рекол Вучиќ.
Претседателот додал дека припојувањето на четири региони кон Русија ќе резултира со уште посилен притисок врз Србија.
-Имавте некои во владата кои се исмејуваа со нивото на притисок. И тогаш се случи во еден ден да бидеме под притисок дека ЕП ќе донесе одлука за прекин на преговорите, па рекоа дека нема да има безвизен режим и дека ќе ни воведат санкции. Значи, ако тоа не е притисок, тогаш кажете што е. Единствено што некој ни ја става главата на трупецот. Кај нашиот народ владее неподнослива леснотија на неодговорност, порачал Вучиќ.