Nissan Motor Co Ltd соопшти дека ќе ги продаде своите фабрики во Русија на државна фирма за 1 евро и, како што пренесува Ројтерс, компанијата е подготвена да претрпи загуба од околу 687 милиони долари и да ја напушти земјата неколку месеци откако беше принудена да го запре производството таму.
Јапонската компанија ќе ги пренесе своите акции во Nissan Manufacturing Russia LLC на руската државна NAMI, се вели во соопштението. Договорот ќе му даде право на Nissan да го откупи целиот бизнис во рок од шест години, соопшти руското Министерство за индустрија и трговија, пренесе Ројтерс.
Nissan е уште една меѓу голем број големи компании кои ја напуштија Русија откако Москва испрати војници во Украина во февруари. Тоа го одразува и потегот на најголемиот акционер на Nissan, францускиот производител на автомобили Renault, кој го продаде својот мнозински удел во рускиот производител на автомобили „Автоваз“ на руски инвеститор во мај.
Продажбата на NAMI ќе ги опфати производствените и истражувачките капацитети на Nissan во Санкт Петербург, како и неговиот продажен и маркетинг центар во Москва, соопшти Министерството.