Повеќе од 50 земји се собраа на маргините на состанокот на НАТО во Брисел во средата за да разговараат за зајакнување на воздушната одбрана на Украина, два дена откако руските проектили паднаа врз Киев и други градови низ Украина.
Собирот во Брисел е првиот голем собир на НАТО откако Русија анектираше четири окупирани украински региони, започна со мобилизација и издаде прикриени нуклеарни закани – потези кои алијансата ги гледа како јасна ескалација на војната што започна со руската инвазија на Украина на 24 февруари.
Два дена откако рускиот ракетен напад уби 19 луѓе во Украина и ја прекина струјата низ целата земја, генералниот секретар на НАТО Јенс Столтенберг побара од сојузниците да испратат повеќе системи за противвоздушна одбрана во Украина.
Столтенберг рече дека „страшните, неселективни напади“ покажале зошто е тоа неопходно.
„Потребни ни се различни видови воздушна одбрана – со краток дострел, долг дострел, за балистички ракети, крстосувачки ракети, беспилотни летала, различни системи за различни задачи“, рече тој по пристигнувањето на состанокот.
Во вторникот Украина го доби првиот од четирите системи за воздушна одбрана IRIS-T SLM што и ги вети Германија, соопшти германското Министерство за одбрана.
Столтенберг ги нарече руските воздушни напади знак на слабост, додавајќи дека тие покажуваат дека на рускиот претседател Владимир Путин му снемува алтернативи бидејќи неговите сили губат на фронтот.
Москва тврди дека Западот е виновен за ескалацијата на конфликтот поради неговата поддршка за Киев.
Министрите за одбрана на земјите-членки на НАТО најпрво ќе се сретнат со партнерите од Украинската одбранбена контакт група, тело формирано на иницијатива на Соединетите држави за да продолжи да го снабдува Киев со оружје. Ќе учествува и украинскиот министер за одбрана Олексиј Резников.
Министрите на НАТО потоа ги започнуваат своите разговори во вечерните часови, пред првата седница во четврток на која ќе разговараат за нуклеарните закани.
Столтенберг рече дека Алијансата не гледа никакви промени во нуклеарниот став на Русија.
„Но, ние ќе останеме будни, ќе продолжиме внимателно да следиме бидејќи нуклеарните закани, нуклеарната реторика и прикриените закани од Русија се опасни и непромислени“, нагласи тој.
НАТО следната недела ќе ја одржи годишната вежба за нуклеарна подготвеност „Steadfast Noon“.
Министрите на земјите од НАТО треба да разговараат и за заштитата на клучната инфраструктура, која стана многу важна по истекувањето на гасоводот „Северен тек“ што оди под Балтичкото Море. Останува нејасно кој стои зад неодамнешните експлозии на овие гасоводи.
Во средата полскиот оператор ПЕРН објави дека открил истекување на едниот крак од нафтоводот Дружба кој ја снабдува Европа со нафта од Русија. Тој нагласи дека најверојатно се работи за ненамерна штета.
НАТО во вторникот ја предупреди Москва дека нападите врз клучната инфраструктура на сојузничките земји ќе имаат „единствен и решителен одговор“.
Столтенберг вети дека ќе ја зајакне заштитата на клучната инфраструктура, велејќи дека НАТО веќе го удвои своето присуство во Балтичкото и Северното Море.