По долг консултативен процес, Министерството за животна средина и просторно планирање на вчерашната јавна расправа го презентираше Нацртот на Законот за прогласување на Кањон Матка за споменик на природата, во кој се предлага категоријата на заштита, зонирањето на заштитеното подрачје, како и начинот на управување.
Расправата ја отвори министерот за животна средина и просторно планирање, Насер Нуредини, кој истакна дека Кањонот Матка е еден од најспецифичните и најуникатните природни локалитети во државата.
– Богатството со природни и културни вредности го вбројуваат Кањонот Матка во еден од најрепрезентативните објекти на природата во Република Северна Македонија – истакна Нуредини, нагласувајќи дека прекрасните видиковци, богатството со спелеолошки објекти посебно пештерите, уникатниот жив свет, културното и духовно богатсво, како и близината до градот Скопје даваат безброј можности Кањонот Матка да стане една од главните туристички еко дестинации во државата.
– Наша цел е да го заштитиме богатството со кое природата не дарувала, но на начин со кој ќе се овозможи одржлив равој и социоекономски просперитет за жителити – одговори Нуредини на прашање на жител на село Глумово за влијанието на прогласувањето на заштитеното подрачје врз животот на локалното население и нивните секојдневни активности.
Со Нацртот на Законот се предвидува со споменикот на природа Кањон Матка да управува Град Скопје во соработка со општина Сарај.
– Задоволни сме што за овој предлог добивме позитивно мислење и од Градот Скопје и од општина Сарај во која се наоѓа овој вреден споменик на природата. Начинот на управување ќе биде тема на расправа кога управувачкото тело ќе изработи Нацрт План за управување за кој исто така ќе биде консултирана јавноста – рече министерот Нуредини.
Презентација за природните вредности и за начинот на зонирање на имаа Васил Атанасовски, конзерватор советник за гео вредностите и биодиверзитетот за Кањон Матка, професор д-р Ивица Милевски, редовен професор на Природно Математичкиот факултет, а на Нацртот на Законот претставници од МЖСПП.
Изработката на Нацрт Законот за прогласување на Кањонот Матка за споменик на природата e во рамки на активностите на Министерството за животна средина и просторно планирање за валоризација или ревалоризација на заштитени подрачја и прогласување на заштитени подрачја и исполнување на обврските од Законот за заштита на природата, Националната стратегија за заштита на природата со Акционен План (2017-2027) и Националната стратегија за биолошка разновидност за период (2018-2023).
Посебно катче за изданијата на МСМЈЛК при УКИМ и бесплатно користење на библиотечните услуги за странските македонисти во Градската библиотека „Браќа Миладиновци” во Скопје
Изданијата на Меѓународниот семинар за македонски јазик, литература и култура при Универзитетот „Св. Кирил и Методиј” во Скопје (МСМЈЛК при УКИМ) ќе бидат подостапни за членовите на Градската библиотека „Браќа Миладиновци” во Скопје, со отворање посебно катче во Библиотеката наменето за овие изданија значајни за македонистиката. Странските македонисти, секоја година, за своите истражувачки цели ќе можат по еден месец бесплатно да ги користат услугите на Библиотеката, во текот на нивните студиски и истражувачки престои – користење библиотечен материјал и користење на читалниците. Заеднички ќе се организираат настани за афирмација на македонските книжевни и културни вредности, наменети за странските македонисти, како и настани со кои ќе се афирмира Скопје, неговата историја и неговите културни вредности.
Ова меѓу другото беше договорено на средбата на директорката на МСМЈЛК при УКИМ, проф. д-р Весна Мојсова-Чепишевска со директорката на Градската библиотека „Браќа Миладиновци” во Скопје, Снежана Стојчевска, на која за првпат се официјализира оваа соработка.
„Во остварувањето на мисијата на МСМЈЛК при УКИМ, изминатиов период ја втемелуваме соработка со низа институции кои покажуваат подготвеност да имаат свој влог во афирмацијата на македонскиот јазик, литература и култура во странство, особено на странските универзитетски и научни центри и да ги поддржат или да се вклучат во активностите важни за странските македонисти. Драго ни е што од денес, меѓу тие институции се вбројува и Градската библиотека во Скопје, и тоа со конкретни, веќе планирани и договорени активности и со можности за странските македонисти. Покрај во Охрид, со учествата на нашите летни школи, странските македонисти, кога се во нашата земја, најчесто се со студиски и истражувачки престои во Скопје и затоа се надеваме дека за нив ќе биде од корист можноста за бесплатно користење на услугите на Библиотеката, со која за нив ќе се зголеми и достапноста на библиотечен материјал важен за нивните истражувања” – истакна на средбата, директорката на МСМЈЛК при УКИМ, Мојсова-Чепишевска.
Можностите за заеднички настани со други институции, наменети за странските македонисти, како што посочи таа, придонесуваат и за наставата по македонистика на странските универзитети. Затоа, особено во овој период кога на универзитетските центри во странство е забележлив интересот и за македонската култура, можностите за заеднички настани со Библиотеката, преку кои ќе се афирмираат културните вредности на Скопје се очекува да придонесат за јакнење на овој интерес, а со тоа и на културните врски со странските академски средини.
„Нашите изданија се наменети за странските македонисти, но тие се значајни и за домашната македонистика, особено зборниците со предавања и зборниците од Меѓународната научна конференција. Изминатиов период настојувавме на нивна што поголема и полесна достапност, заради што објавуваме и електронска форма од овие изданија. Но подадената рака од Библиотеката за отворање посебно катче, дополнително ќе придонесе и за информираноста и за достапноста за дел од овие изданија за домашната заинтересирана јавност, а и за странските македонисти во тек на нивните престои кога ќе ги користат читалниците на библиотеката” – нагласи Мојсова-Чепишевска.
„Чест ни со сиот наш капацитет да одговориме на оваа благородна работа, да ги чуваме, документираме и да ги направиме што подостапни насловите поврзани со сè што значи проучување на македонскиот јазик, литература и култура. Нашата местоположба како и професионалноста на вработените во специјализираните оддели, се главните адути на нашата институција, која со голема посветеност одговора на барањата на сите истражувачи кои и досега доаѓале кај нас и го користат богатиот библиотечен материјал. Библиотеката е отворена и за домашните и за странските македонсисти, за кои обезбедивме едномесечно беслатно членство, а наскоро и соодветно македонистичко катче. Активностите што ги планираме заедо со Семинарот, ќе значат поддршка на македонистиката однатре, но и соработка со останатите културни и академски центри низ светот, каде што има луѓе кои ги почитуваат и проучуваат македонскиот јазик и култура” – подвлече Снежана Стојчевска, директорка на ЈУ Градска библиотека „Браќа Миладиновци” – Скопје.
Како што беше договорено на средбата, за бесплатното користење на услугите на Градската библиотека во Скопје, МСМЈЛК при УКИМ ќе ја известува Библиотеката кога странски македонист ќе има потреба од користење на нејзините услуги, по што покрај користењето на читалниците ќе биде овозможен за користење и севкупниот потребен библиотечен материјал со кој се располага.
На средбата се разговараше и за конкретни други активности за промоција и афирмација на македонските литературни вредности и воопшто на културните вредности кои се во форма на библиотечен материјал, пред странските македонисти и во соработката со странски образовни и научни центри.
Едномесечното бесплатно користење на услугите на Градската библитека „Браќа Миладиновци” во Скопје за странските македонисти, веќе е овозможено, а во следните месеци ќе се работи и на отворањето на катчето со изданија на МСМЈЛК при УКИМ.