Босна и Херцеговина е меѓу земјите кои се приклучија на најновите санкции на Европската унија против Русија, поради агресијата на таа земја против Украина.
Советот на Европската унија на 6 октомври ја одобри одлуката за воведување нов пакет економски и индивидуални санкции против Русија.
Договорениот пакет ја воведува во законодавството на ЕУ основата за утврдување на горната граница на цените за поморски транспорт на руска нафта до трети земји и натамошни ограничувања на поморскиот транспорт на сурова нафта и нафтени деривати до трети земји.
Покрај тоа, ЕУ воведе дополнителни ограничувања за увоз на дрвна целулоза и хартија, цигари, пластика и козметика, како и предмети што се користат во индустријата за накит, како што се камења и благородни метали, кои генерално генерираат значителен приход за Русија.
Европската унија ја одобри и одлуката за воведување санкции против уште 30 физички и седум правни лица во врска со руската агресија врз Украина.
„Земјите кандидати Северна Македонија, Црна Гора, Албанија и Украина, потенцијалната земја-кандидат Босна и Херцеговина и земјите од ЕФТА Исланд, Лихтенштајн и Норвешка, членки на Европската економска зона, ја почитуваат оваа Одлука на Советот.
Тие ќе се погрижат нивните национални политики да бидат конзистентни со оваа Одлука на Советот.
Европската унија ја забележува оваа посветеност и ја поздравува“, најави високиот претставник на Европската унија за заедничка надворешна и безбедносна политика, Жозеп Борел.