Директорот на турската компанија „Бајкар“, која произведува дронови Бајрактар, соопшти денеска дека компанијата планира во следните две години да изгради фабрика во Украина.
„Нашиот план напредува. Во моментов имаме архитектонски проект. Фазата на детален проект е завршена. И наскоро ќе започнеме со изградба. Сакаме да ја завршиме во рок од две години“, рече Халук Бајрактар на маргините на саемот за одбрана САХА во Истанбул.
Беспилотните летала Бајрактар испорачани на Украина од компанијата „Бајкар“ беа клучни во одбраната на Украина од руските оклопни и противвоздушни системи во првите неколку недели од руската инвазија, наведува „Ројтерс“.
Планот „Бајкар“ да изгради фабрика во Украина е дел од договорот потпишан меѓу Анкара и Киев непосредно пред рускиот напад на Украина на 24 февруари.
Претходно, Русија се закани дека ако турска компанија гради фабрика во Украина, тоа ќе биде легитимна воена цел.
„Самиот факт дека таков објект би се изградил веднаш спаѓа во категоријата демилитаризација, тоа мора да се разбере. Се разбира, тоа само ќе го продолжи страдањето на Украинците, но нема да им помогне да ја избегнат целта на оваа специјална воена операција“, рече тогаш Песков.