Хрватска пошта не сака да произведува печат со ликот на Тито

Хрватската пошта не одобри изработка на поштенски печат со ликот на Јосип Броз Тито, што беше барање на Здружението на антифашистички борци и антифашисти (САБА), како и на Здружението „Јосип Броз Тито Хрватска“, за филателистичка изложба по повод 130-годишнината од раѓањето на Тито.

Поштенскиот жиг е вообичаен за некои манифестации и настани, во случајов печатот со ликот на Тито требало да биде во употреба само во една пошта во Загреб и тоа само еден ден, објави Хина.

Претседателот на Здружението Јосип Броз Тито Хрватска, Јован Вејновиќ изјави дека одбивањето на Хрватска пошта не го изненадува, додавајќи дека е свесен за општествената атмосфера во Хрватска.