Британскиот истражувачки центар Royal United Services Institute (RUSI) дошол до документи наводно потпишани од претседателот на Руската Федерација, Владимир Путин, во кои се наведува дека Русија планирала да ја освои Украина за 10 дена и да ја припои до август 2022 година.
Според споменатите документи, само мал број руски функционери знаеле за сите детали од тие планови. Во нив пишува дека претставниците на одредени ограноци на руската армија не знаеле дека се подготвува инвазија на Украина и дека за тоа дознале само неколку дена пред да започне, пренесе Jutarnji.hr.
Некои единици дознале за инвазијата само неколку часа пред да започне. Русија планираше да ги заземе украинските трафостаници, аеродромите, водоводот, централната банка и парламентот, а руските специјални сили требало да ги убијат украинските лидери.
RUSI наведува дека Русија очигледно очекувала членовите на украинската влада или да побегнат од земјата или да бидат фатени. Украинските разузнавачи веруваат дека Русија планирала да ги искористи белоруските воздухопловни сили за да ги заземе нуклеарните централи Ривне и Хмелницки.
Споменатите документи содржеле и упатства за запленување на украинските нуклеарни централи и контрола на украинската енергетска мрежа. Русија наводно сакала да ја уценува Европа со ризик од радијација.
RUSI вели дека Русија сакала да ја започне инвазијата со бројни воздушни и ракетни напади врз украински воени цели. Во документите се наведува дека Русија не планирала да ја уништи украинската инфраструктура бидејќи е важна за нејзината окупација на земјата.
Руското контраразузнавање составило список на Украинци, кој беше поделен во четири категории – луѓе за убивање, луѓе за заплашување, луѓе за поттикнување соработка и луѓе подготвени за соработка.
Русите, како што е наведено, планирале да ги попишат и класифицираат сите Украинци, процес кој требало да личи на попис. Русија планирала да ги принуди локалните и регионалните власти да соработуваат, а руските разузнавачи требало да ги уапсат украинските претставници.
Конечно, Русија планирала да испрати наставници и службеници во Украина кои тогаш требало да започнат проект за „превоспитување“ на Украинците.