Генералниот секретар на НАТО Јенс Столтенберг денеска изрази загриженост дека руската војна во Украина може да излезе од контрола и да се претвори во војна меѓу Русија и воената алијанса.
„Во Украина има страшна војна. Тоа е и војна која може да стане вистинска војна која ескалира во голема војна меѓу НАТО и Русија. Работиме секој ден за да го избегнеме тоа“, изјави Столтенберг во интервју за норвешката телевизија НРК, објавено денеска.
Столтенберг, поранешниот премиер на Норвешка, изјави дека „нема сомнеж дека е можна војна од целосен обем“ и додаде дека е важно да се избегне конфликт „во кој се вклучени неколку земји во Европа“.
Кремљ упорно го обвинува НАТО дека станала страна во конфликтот со снабдување на Украина со оружје, обука на нејзините војници и обезбедување воено разузнавање за напад на руските сили.
Рускиот претседател Владимир Путин денеска повторно го обвини Западот дека ја користи Украина како алатка против Русија.
„Западот многу години бесрамно ги експлоатираше и ги исцрпуваше неговите ресурси, поттикнуваше геноцид и терор во Донбас и фактички ја претвори земјата (Украина) во колонија. Сега тој цинично го користи украинскиот народ како топовско месо, како овен против Русија, продолжувајќи да ја снабдува Украина со оружје и муниција, испраќа платеници и ја турка на самоубиствен пат“, рече Путин.