Зголемувањето на трошоците за живот е најитната грижа за 93 отсто од Европјаните, покажа најновото истражување на Евробарометарот на Европскиот парламент.
Загриженоста за зголемените трошоци на живот е внимателно проследена со загриженоста за заканата од сиромаштија и социјалната исклученост, што ја доживуваат 82 отсто од Европјаните.
Во меѓувреме, поддршката на ЕУ останува стабилна, но граѓаните очекуваат ЕУ да продолжи да работи на решенија за ублажување на ефектите од кризата.
Во секоја земја-членка на ЕУ, повеќе од седум од десет испитаници се загрижени за зголемените трошоци за живот, со највисоки резултати во Грција со 100 отсто, Кипар со 99 отсто, Италија и Португалија со по 98 отсто.
Зголемените цени, вклучително и енергијата и храната, се чувствуваат во сите социо-демографски категории, како што се полот или возраста, како и во сите образовни и социо-професионални средини.
Втората најспоменувана загриженост со 82 отсто е заканата од сиромаштија и социјалната исклученост, а потоа следат климатските промени и ширењето на кризата во Украина во други земји на трето место со 81 отсто.
Граѓаните очекуваат ЕУ да продолжи да работи на решенија за ублажување на сложените ефекти од последователните кризи што го погодија континентот.
Високата поддршка за ЕУ се надоврзува на искуството од минатите години, но само една третина од Европјаните изразија задоволство од мерките преземени од нивните национални влади или ЕУ за справување со зголемените трошоци за живот.