Бербок повика на формирање меѓународен трибунал за гонење на руските лидери

Германската министерка за надворешни работи Аналена Бербок повика денеска во Хаг да се формира специјален меѓународен трибунал за гонење на руските лидери одговорни за инвазијата на Украина.

„Потребен е трибунал кој може да го истражи и гони руското раководство“, рече Бербок во воведниот говор на Академијата за меѓународно право во Хаг, каде што е седиштето на Меѓународниот кривичен суд.

Бербок потсети дека е разбирливо што украинската влада е загрижена поради фактот што руските лидери не можат да бидат кривично гонети за нападот врз Украина.