Кинеската социјална мрежа TikTok денеска објави дека има 150 милиони месечни активни корисници во САД, што е за 50 отсто повеќе отколку во 2020 година, кога имало 100 милиони.
Оваа информација беше претставена пред сведочењето на извршниот директор Шо Чи-Чева пред Комитетот на американскиот Конгрес за енергија и трговија во четвртокот, пренесува Ројтерс.
„ТикТок“ се соочува со зголемен притисок од администрацијата на американскиот претседател Џозеф Бајден и Конгресот, што вклучува повици од некои пратеници да ја забранат апликацијата затоа што, наводно, може да ги пренесе податоците на американските корисници до владата во Пекинг.
Во петокот, уште шест американски сенатори ја поддржаа легислативата што ќе му даде на Бајден овластување да го забрани TikTok за да ја заштити националната безбедност.
Креаторите на апликацијата, во сопственост на кинеската технолошка компанија ByteDance, соопштија дека нејзините директори ќе дојдат во Вашингтон оваа недела за да расправаат зошто апликацијата не треба да биде забранета.
TikTok минатата недела објави дека администрацијата на Бајден побарала нејзините кинески сопственици да се откажат од својот удел во компанијата, во спротивно мрежата би можела да се соочи со забрана од САД.
Европската комисија и неколку други западни влади ја забранија употребата на TikTok на уредите на нивните службеници.
Во септември 2021 година, TikTok објави дека има повеќе од една милијарда корисници ширум светот.