Најмалку пет лица се повредени при уривање на четирикатна станбена зграда во Марсеј, објави градоначалникот Беноа Пајан.
Пожарот ги спречи спасувачите да трагаат по други можни жртви, а се сомнева дека до уривањето на зградата дошло од експлозија, пренесе BFMTV.
„Постојат силни сомневања дека експлозија предизвикала уривање на зградата, но во оваа фаза мора да бидеме многу внимателни за причините за несреќата“, изјави префектот на регионот Буш-де-Рон, Кристоф Мерман, додавајќи дека причина може да биде експлозија на гас.
Пожарот ги спречи и дресираните кучиња да ги пребаруваат урнатините за евентуални жртви.
„Се обидуваме да ја забрзаме акцијата бидејќи времето е важно, но кучињата не можат да ја издржат оваа температура и топлина“, изјави командантот на баталјонот на противпожарната бригада на Марсеј, Лионел Матје.
Локалните власти соопштија дека се уште не се знае колку луѓе живееле во зградата.