Џери Спрингер, водителот познат по својот бурен стил на разговор, почина на 80-годишна возраст.
Контроверзниот американски новинар го водeше шоуто „Џери Спрингер“ од 1991 година.
Спрингер почина мирно во четвртокот во својот дом во Чикаго, потврдија неговите менаџери за Би-Би-Си.
Џин Галвин, пријател и портпарол на неговото семејство, го опиша како „незаменлив“.
„Способноста на Џери да се поврзе со луѓето беше главната причина за неговиот успех во сè што правеше, без разлика дали тоа беше политика, телевизија или едноставно правење шеги со луѓето на улица кои сакаа да разговараат или да се фотографираат со него“, рече тој.
„Ова е непоправлива загуба и многу боли, но сеќавањата на неговиот интелект, срце и хумор ќе живеат“, додаде тој.
Пред да ја започне својата новинарска кариера, за време на која беше политички известувач и коментатор, Спрингер беше градоначалник на Синсинати во 1977 година и советник за време на политичките кампањи на Роберт Кенеди, политичар и брат на поранешниот американски претседател Џон Кенеди.
Започнато во 1991 година, шоуто „Џери Спрингер“ првично беше засновано на дискусија за социјалните прашања и американската политика.
Но, за да допре до поголема публика, Спрингер, син на германски имигранти со еврејско потекло, по неколку години направи промени и се фокусираше на непристојни и провокативни содржини.
Во повеќето епизоди гостите зборуваа за семејни проблеми, прељуба и други престапи.
Спрингер требаше да посредува во овие разговори, но тие често завршуваа со физички пресметки, додека обезбедувањето се обидуваше да ги смири гостите.
Во втората половина на 1990-тите, емисијата беше најгледаната дневна емисија во Америка, надминувајќи ја гледаноста на познатата водителка Опра Винфри.