LinkedIn, кој на корисниците им нуди професионална социјална мрежа со исто име за деловни контакти, во вторникот објави дека ќе укине 716 работни места и ќе ја затвори својата апликација Incareer, достапна во Кина, за што нејзиниот американски сопственик Microsoft рече дека се должи на „жестоката конкуренција“ и „тешката макроекономска клима“.
Компјутерскиот гигант беше една од ретките американски интернет компании кои успеаја да наметнат социјална мрежа во Кина и покрај цензурата и строгите локални регулативи.
Microsoft им понуди на Кинезите верзија на својата професионална мрежа додека се придржуваше до драконските мерки преку заеднички локални инвестиции.
Шефот на LinkedIn, Рајан Рослански изјави дека укинувањето на работните места е неопходно поради рационализацијата на работењето на компанијата, а во иднина повеќе ќе се користат услугите на надворешните соработници.
Тој исто така рече дека промените ќе резултираат со отворање на 250 нови работни места, а портпаролот на LinkedIn најави дека вработените кои останале без работа во компанијата ќе можат да се натпреваруваат за нови позиции.