Во своите мемоари, принцот Хари признал дека консумирал опијати, поради што Американците можат да му ја укинат визата.
Американска конзервативна организација побара од американскиот федерален суд да ги открие одговорите на принцот Хари за претходната употреба на дрога во неговото барање за американска виза бидејќи во интерес на јавноста е да се види како американските власти постапуваат во таква ситуација и дали тој криел нешто.
Наводите на војводата од Сасекс за употреба на кокаин, марихуана и психоделични дроги во неговите мемоари „Резерва“ ја натераа конзервативната тинк-тенк во Вашингтон да се запраша зошто му било дозволено да влезе во САД во 2020 година.
Фондацијата Heritage поднесе тужба против американското министерство за домашна безбедност (DHS) откако нејзиното барање за податоците од Законот за слобода на информации беше одбиено, тврдејќи дека тоа е од „преголем јавен интерес“.
Во тужбата на фондацијата од Вашингтон се тврди дека американскиот закон „генерално го смета влезот“ на таквите лица во земјата за недозволив.
Говорејќи по првото рочиште пред федералниот суд за овој случај, Нил Гардинер од тинк-тенкот им рече на новинарите дека тужбата има за цел да го постави прашањето за одговорноста на личност со истакнат јавен профил и американската влада.
„На крајот на денот, станува збор за одговорноста, транспарентноста и отвореноста на американската администрација во однос на апликацијата за имиграција на поединец од висок профил“, рече Гардинер.
За време на сослушувањето во федералниот суд во Вашингтон во вторникот, адвокатот на тинк-тенкот, Семјуел Дјуи, му кажа на судијата дека нивниот случај се однесува на војводата од Сасекс, но и за тоа како DHS „го следи законот“.
Дјуи му рекол на судијата Карл Николс дека ова прашање добило „широко распространето и извонредно медиумско внимание“ што покренало „прашања за интегритетот на владата“.
Адвокатот на DHS, Џон Бардо, тврди дека написите цитирани од тинк-тенк за поддршка на тужбата не покажуваат дека има преголемо медиумско внимание и не укажа на какво било прекршување на законот од страна на американската влада.
Во контроверзните мемоари, војводата рече дека кокаинот „не направи ништо за мене“, додавајќи: „Марихуаната е поинаква, всушност навистина ми помогна“.
Зборувајќи за тоа зошто тинк-тенкот го покрена случајот, тој им рече на новинарите: „Ова навистина се однесува на американскиот закон за имиграција, кој обезбедува негова правична и еднаква примена за сите. Никој не треба да биде над законот и никој не треба да биде привилегиран.
Со оглед на широката употреба на нелегални дроги од страна на принцот Хари, тој треба да одговара за неговото барање“.