Генералниот секретар на НАТО, Јенс Столтенберг, за денеска во Вилнус свика средба на турскиот и шведскиот лидер во пресрет на самитот на НАТО, со цел уште еднаш да се обиде да ја отстрани турската блокада за членството на Шведска во Северноатлантската алијанса.
Столтенберг свика средба меѓу турскиот претседател Реџеп Тајип Ердоган и шведскиот премиер Улф Кристерсон еден ден пред дводневниот состанок на самитот на НАТО на кој алијансата сака да покаже единство во лицето на руската инвазија на Украина.
Турција и Унгарија допрва треба да го одобрат влезот на Шведска
Генералниот секретар минатата недела изјави дека приемот на Шведска во НАТО е блиску.
„Она што е важно е да имаме позитивен исход следната недела“, рече тој за новинарите по состанокот со претставниците на Турција и Шведска во четвртокот.
Шведска и Финска аплицираа за членство во НАТО минатата година, напуштајќи ја децениската воена неутралност.
Апликацијата за членство во алијансата мора да биде одобрена од сите членки на НАТО и додека Финска доби зелено светло во април, Турција и Унгарија допрва треба да го одобрат влезот на Шведска. Будимпешта соопшти дека ќе го стори тоа кога Турција ќе го стори истото.
Ердоган треба да се сретне со Бајден
Ердоган треба да се сретне со Џо Бајден во Вилнус на маргините на самитот, каде се очекува американскиот претседател уште еднаш да се обиде да го убеди турскиот колега да го одобри шведското членство.
Турскиот претседател вели дека Шведска е засолниште за членови на милитантни групи, главно поддржувачи на Курдистанската работничка партија (ПКК), која тој ја обвинува за организирање протести и финансирање терористички групи.
Шведска соопшти дека ги исполнила барањата договорени во преговорите со Турција, вклучително и воведувањето на нов закон што го прави незаконски членството во терористичка организација.
Во петокот, Ердоган вети дека ќе ја донесе „најдобрата одлука, каква и да е таа“, практично велејќи дека сите опции се сè уште на маса.
Клучот, сепак, може да биде во Вашингтон: аналитичарите проценуваат дека зеленото светло на Турција за Шведска е условено со испорака на американски борбени авиони Ф-16 во Анкара, што Турција го негира.