Претседателите на шест медитерански земји денеска во заедничка изјава побараа да се преземат итни чекори за решавање на „климатската криза“ откако големи делови од Европа беа погодени од големи топлотни бранови, шумски пожари и поплави.
„Екстремните природни феномени го уништуваат екосистемот и го загрозуваат нашиот секојдневен живот, нашиот начин на живот“, се вели во соопштението потпишано од претседателите на Италија – Серџо Матарела, Грција – Катерина Сакеларополу, Хрватска – Зоран Милановиќ, Словенија – Наташа Пирц Мусар, Малта – Јоргос Веља и Португалија – Марсело Ребело де Соуза.
Се нагласува дека „нема повеќе време за губење“, ниту за „компромис од политички или економски причини“ и се додава дека особено медитеранскиот регион е изложен на ризици од недостиг на вода, пренесува „Ројтерс“.
„Сите медитерански земји мора да се координираат, да реагираат и да се здружат во колективните напори за запирање и враќање на ефектите од климатската криза“, се додава во соопштението, наведува „Танјуг“.
Соопштението е објавено на иницијатива на Матарела и Сакеларополу по нивниот телефонски разговор.
Големи области на Медитеранот минатиот месец беа погодени од интензивен топлотен бран, а смртоносните пожари беснеат од Алжир до Турција.
Се стравува дека ваквите екстремни лета во Јужна Европа ќе ја оштетат туристичката индустрија, како и жетвата, кои се двата главни столба на економијата во регионот.