Министерот за земјоделство, шумарство и водостопанство Љупчо Николовски денеска го посети Научниот институт за тутун во Прилеп, една од најстарите научни институции на Балканот, која што следната година го слави својот 100. роденден. Институтот за тутун е важна научна институција во производството на тутун и сите овие години успешно ја извршува својата научна дејност, се наведува во денешното соопштение на МЗШВ.
– Преку Програмата за рурален развој, МЗШВ обезбеди финансиска поддршка за Институтот во вредност од 5.740.000 денари, за поставување на систем за наводнување, капка по капка, на опитните полиња. Системот наводнува 14 хектари површина на која се сади сортата „Прилеп 66“, која е сопствена сорта на Институтот. Министерот, заедно со директорката на Научниот институт, професор доктор Валентина Пеливаноска, ги посети опитните полиња каде веќе е поставен новиот систем за наводнување, капка по капка, се појаснува во соопштението.
Министерот ја посетил и Ген банката, која е во состав на Институтот за тутун, каде се чува семенски материјал од 56 сорти и се одржуваат сите автохтони сорти на тутун.
– Преку ИПА програмата со средства од ЕУ, Институтот доби нова опрема што ќе помогне за научни цели и поддржување на автохтоните раси. Ген банката, со поддршка на МЗШВ, Управа за семе и саден материјал, преку ИПА проект е доопремена со четири нови, современи апарати и тоа, ртилиште за семиња, aвтоматски електронски бројач на семки, eлектрична сушница и дехумификатор, се додава во соопштението.
Во текот на денешната посета на Прилеп, министерот го посетил и Музејот за тутун, еден од најголемите тутунски музеи во светот. Оваа година одбележува 100 години од организираното производство на тутун во Прилеп и 400 години откако тутунот дошол во ова место. Музејот содржи над 4.000 експонати. Некои од нив им припаѓале на познати иматели од историјата и кулоарската историја, некои им припаѓале на познати личности од благородништвото, или биле користени во посебни историски прилики.
– Компанијата „БИМФООД“ од Прилеп е уште еден позитивен пример на успешена ИПАРД приказна, што максимално ја има искористено секоја можност од ИПАРД програмата, со дури три апликации. Преку средства од ИПАРД програмата, оваа компанија има реализирано поддршка во висина од 19,9 милиони денари за набавка на опрема со што го има проширено и модернизирано своето производство, воведувајќи модерни технологии. Како компанија, „БИМФООД“ е еден од лидерите на Балканот во собирањето, преработката, пакувањето и дистрибуцијата на диви печурки, а во својата дејност вршат откуп и преработка на овошје и зеленчук, истакнуваат од МЗШВ.
Од Министерството додаваат дека во тек е последниот јавен повик за мерката 3 од ИПАРД 2 програмата во вредност од 8,8 милиони евра, наменет за инвестиции во основни средства, опрема, за преработка на земјоделски и рибни производи. Крајниот рок за поднесување на барања за овој повик е до 18 септември.
– Наскоро преку распишувањето на првите јавни повици започнува и реализирањето на новата ИПАРД 3. Како земја лидер први во регионот со буџет од над 90 милиони евра европска поддршка ја започнуваме новата ИПАРД програма, за нови инвестици и модернизација на македонското земјоделство, се потенцира во соопштението на МЗШВ.