Русија и Арапската лига ќе работат на „запирање на крвопролевањето“ во Израел и Газа, изјави денеска рускиот министер за надворешни работи Сергеј Лавров за време на приемот во Москва на генералниот секретар на организацијата која ги обединува арапските држави.
„Сигурен сум дека Русија и Арапската лига пред се ќе работат на запирање на крвопролевањето“ со земјите кои сакаат „траен мир на Блискиот Исток“, рече Лавров.
Лавров оцени дека е потребно не само да се прекинат конфликтите и да се решат проблемите со цивилите, кои во огромен број стануваат жртви на сегашната ситуација, туку и да се утврди причината зошто нема решение за израелско-палестинскиот конфликт.
Генералниот секретар на Арапската лига, Ахмед Абул Геит повика на праведно решение на израелско-палестинскиот конфликт.
Тој додаде дека неговата организација го отфрла насилството на двете страни во конфликтот.
Судирите продолжуваат и денеска, на трет ден од почетокот на ненадејната голема офанзива на палестинскиот екстремистички Хамас на територијата на Израел од Појасот Газа.