Северна Кореја ја информираше Јапонија дека планира да лансира сателит меѓу 22 ноември и први декември, а Токио и Сеул веруваат дека тоа би можело да биде трет обид да се стави шпионски сателит во орбитата.
Јапонската крајбрежна стража во вторникот објави дека Северна Кореја испратила известување за лансирањето во правец на Жолтото Море и Источното Кинеско Море. Националната агенција за поморска безбедност на Јужна Кореја издаде предупредување до бродовите за планираното лансирање за истите области како и во случајот со претходните лансирања.
Претходно оваа година, Северна Кореја двапати се обиде да лансира, како што вели, „шпионски сателити“, но без успех. Јужнокорејските власти во последните денови предупредија дека се чини дека наскоро ќе се обидат повторно.
Јапонскиот премиер Фумио Кишида ги осуди плановите и рече дека одбранбените системи на неговата земја, вклучително и разурнувачите Егис и ракетите за противвоздушна одбрана PAC-3, се подготвени за секоја „неочекувана ситуација“.
„Дури и ако целта е да се лансира сателит, употребата на технологија за балистички проектили е кршење на голем број резолуции на Советот за безбедност на Обединетите нации“, изјави Кишида за новинарите. „Тоа е исто така прашање што во голема мера влијае на националната безбедност“, додаде тој.
Јапонија ќе соработува со САД, Јужна Кореја и други за да ја убеди Северна Кореја да не продолжи со лансирањето, рече Кишида.
Јужнокорејското министерство за одбрана соопшти дека го следи планираното лансирање на Северна Кореја.
Пјонгјанг ги смета своите вселенски и воени ракетни програми за суверено право и планира да има флота сателити за следење на движењата на американските и јужнокорејските сили.
Зајакнувањето на воената моќ е суверено право на Северна Кореја и е одговор на системот за вселенски надзор предводен од САД, објави во вторникот државниот медиум KCNA.