Високиот претставник на Хамас во Либан Осама Хамдан изјави вели дека сè уште не е постигнат договор за продолжување на привремениот прекин на огнот во Газа и оти групата не смета дека понудата на Израел вреди да се разгледа.
– Напорите за продолжување на примирјето сè уште не се созреани, а што се однесува до понудата што ни беше дадена за продолжување на примирјето, не сметаме дека е достојна да ја проучуваме, изјави Хамдан за информативниот портал Ал-Мадајин, поврзан со Хезболах.
Тој додаде дека „отпорот е подготвен, а ако продолжи примирјето и Хамас ќе продолжи со примирје, но подготвен е за секаква можност по завршувањето на прекинот на огнот“.
Според Хамдан, она за што сега се зборува е „запирање на агресијата и укинување на опсадата на Газа, а потоа ќе се разговара за размена на затвореници“, истакнувајќи дека „нема да се зборува за размена на воените затвореници на Хамас пред да се запре агресијата и да се укине опсадата на Газа“.
Примирјето, кое првично требаше да заврши во понеделникот, беше продолжено за два дена и ќе истече утре наутро доколку не се постигне договор за дополнително продолжување.