Ferrari F512 M е последната, но и најбрзата и најретката верзија на познатиот модел Testarossa. Имено, во периодот од 1994 до 1996 година се направени само 501 примерок од овој модел, што е многу помалку од оригиналната Testarossa (7.177 примероци) и втората верзија на 512 TR (2.261 примероци).
Ferrari F512 M првпат беше претставен на салонот во Париз во 1994 година, со 12-цилиндричен мотор со зафатнина од 4,9 литри. Сместен во средината на каросеријата, овој агрегат ослободува 440 КС при 6.750 вртежи во минута и 500 Nm вртежен момент при 5.500 вртежи во минута. Силата се пренесува на задната оска со петстепен мануелен менувач, а гумите се 235/40 ZR18 на предните и 295/35 ZR 18 на задните тркала.
Моторот има четири вентили по цилиндар (48 вентили), се подмачкува преку систем на сув картон, а односот на компресија е 10,4 : 1. Благодарение на новите титаниумски поврзувачки шипки и новото коленесто вратило, кои се 7,26 килограми полесни од оние што ги заменуваат, електронското ограничување на брзината е 7.500 вртежи во минута.
Ferrari F512 M забрзува од место до 100 km/h за 4,7 секунди, а максималната брзина е 315 km/h. Во согласност со надградениот мотор, тоа е значително посериозна изведба во споредба со претходните верзии на Testarossa.
Кога станува збор за естетските промени, F512 M има класични, заоблени предни светлосни групи наместо квадратни „појавни“ фарови. Предниот браник и задните светлосни групи беа редизајнирани во стилот на тогаш најновиот Ferrari F355, додека легендарните странични „решетки“ останаа недопрени. F512 M е препознатлив и по автентичните тркала со пет краци во форма на „шурикен“.
Овој микс на стајлинг од осумдесеттите и деведесеттите предизвика различни реакции во јавноста, за разлика од оригиналната Testarossa, која го воодушеви автомобилскиот свет со својот авангарден дизајн во 1984 година. Кога станува збор за внатрешноста, тој е само малку променет во однос на моделот 512 TR. Климатизацијата стана дел од стандардната опрема, а тркачките седишта од јаглеродни влакна беа достапни како опција и без доплата. Како и неговите два претходници, Ferrari F512 M е дизајниран од студиото Pininfarina.
Иако не предизвика сензација на својата премиера во 1994 година како оригиналниот Ferrari Testarossa една деценија порано, F512 M е многу интересен автомобил. Малиот број на примероци произведени за краток временски период ја прави најегзотичната верзија на Testarossa. Ова, секако, подразбира исклучително висока оценка меѓу најбогатите колекционери.