Мрежата за спречување самоубиства на мостот „Голден Гејт“ во Сан Франциско конечно е завршена. Околу 2.000 луѓе скокнале од мостот откако тој беше отворен во 1937 година во овој американски град.
Со децении, семејствата кои изгубија најблиски поради самоубиство на мостот, бараа решение. Систем за одвраќање од самоубиство, познат и како мрежа, е инсталиран околу 95 отсто од мостот долг 2,7 километри.
„Целта на мрежата е да го намали бројот на смртни случаи. Мрежата е докажан дизајн кој ги одвраќа луѓето од скокање, служи како симбол на грижа и надеж за обесхрабрените поединци и доколку е потребно, им нуди на луѓето втора шанса“, се вели во соопштението на компанијата која стопанисува со мостот и автопатите.
Мрежата од нерѓосувачки челик беше одобрена во 2014 година, но работата започна дури четири години подоцна. Имаше и противење од оние кои тврдеа дека тоа влијае на погледот и дека е прескапо.
Кевин Хајнс е еден од само 40-те луѓе за кои се знае дека го преживеале скокот од мостот. Оттогаш, тој стана поборник за превенција од самоубиства. Хајнс беше еден од оние кои водеа кампања за мрежата.
„Да беше мрежата таму, ќе бев запрена од полицијата и веднаш ќе ја добиев потребната помош и никогаш немаше да скршам три пршлени и никогаш да не стапнам на патеката на која бев. Многу сум благодарен што мала група истомисленици никогаш не се откажаа од нешто толку важно“, изјави Хајнс за Асошиејтед прес.