Осомничениот Далибор Драгијевиќ (40) од Бор, кому во саботата му е одреден притвор до 48 часа поради постоење основи на сомнение дека му помагал на Дејан Драгијевиќ (50), осомничен за убиството на двегодишната Данка Илиќ по стореното дело, починал во Полициското одделение во Бор.
На Далибор Драгијевиќ му се слошило во раните утрински часови и покрај навремената реакција на полициските службеници и лекарите од Здравствениот дом во Бор, кои се обиделе на реанимација, тој починал во 3 часот и 10 минути, а лекарот судски вештак констатирал природна смрт.
За настанот веднаш е известено Вишото јавно обвинителство во Зајечар, кое нареди обдукција во Институтот за судска медицина во Белград.
Да потсетиме, Срѓан Јанковиќ и Дејан Драгијевиќ, кои беа уапсени под сомнение за убиството на Данка Илиќ, беа сослушани во петокот вечерта, а вчера беа приведени. Драгијевиќ пред обвинителот го признал делото, а Јанковиќ се бранел молчејќи. Потоа на двајцата им беше одреден притвор до 30 дена.
Во меѓувреме полицијата ги уапси Раде и Далибор Драгијевиќ, таткото и братот на Дејан Драгијевиќ, под сомнение дека му помагале да го премести телото на убиеното девојче. Тие треба да бидат сослушани денес.
Дејан Драгијевиќ вчера во придружба на полицијата бил донесен пред куќата во која живее во селото Злот, додека цистерна ја испумпувала септичката јама околу куќата во потрага по телото на Данка Илиќ, но ништо не било пронајдено.
Полицијата од куќата на Драгијевиќ извадила вреќи со докази, а од едната ѕиркала рачка слична на рачка од лопата или кец. Тој предмет ќе биде испратен на вештачење за да се утврди дали е употребен во кривично дело.
Претседателот на Србија, Александар Вучиќ изјави дека убијците на Данка Илиќ мислеле дека ќе останат неказнети и дека смртната казна е единствената соодветна казна за ова дело.