Работната група на Советот за човекови права на Обединетите нации денеска на состанок во Женева по четврти пат ги разгледува податоците за состојбата на човековите права во земјава. Македонија е една од 14-те држави што треба да бидат прегледани од страна на работната група на универзалниот периодичен преглед на седницата, што се одржува од 29-ти април до 10-ти мај.
Работната група на УПП се состои од 47 земји-членки на Советот за човекови права, секоја од 193-те земји-членки на ОН може да учествува во прегледот на земјата.
-Документите врз што се темелат прегледите се: 1) националениот извештај – информации обезбедени од страна на државата што се разгледува; 2) информации содржани во извештаите на независни експерти за човекови права и групи, познати како специјални процедури, договорни тела за човекови права и други ентитети на ОН; 3) информации обезбедени од други засегнати страни, вклучувајќи ги националните институции за човекови права, регионалните организации и групите за граѓанско општество, се појаснува во соопштението.
Претходните ревизии на состојбата со човековите права во Северна Македонија се одржаа во мај 2009 година, јануари 2014 година и јануари 2019 година.
Македонска делегација предводена од министерот за надворешни работи Османи присуствува во Женева. Тројката известители за преглед на човековите права во земјава се Албанија, Бенин и Финска.
Неодамна, Стејт департментот на САД го објави извештајот за состојбата со човековите права во Македонија во 2023 година, во кој, меѓу другото, беа регистирирани сериозна владина корупција и сериозни ограничувања на слободата на изразување и слободата на медиумите, вклучително и насилство и закани со насилство врз новинари.