Амбицијата на раководството на Барселона е на лето сериозно офанзивно да го засили тимот на Чави Ернандез. За таа цел се идентификувани двајца шпански фудбалери за чии трансфери клубот ќе работи на лето. Станува збор за Дани Олмо (РБ Лајпциг) и Нико Вилијамс (Атлетик Билбао).
Според „Мундо Депортиво“, полесно ќе биде привлекувањето на првиот, кој е член на школата на „блаугранас“. Веќе се разговарало со Олмо и тој јасно ставил до знаење дека сака да игра за Барселона. Каталонското издание тврди дека клубот е подготвен да ја плати клаузулата за ослободување на играчот, која изнесува 60 милиони евра, а олеснувањето доаѓа поради фактот што РБ Лајпциг ќе се сложи сумата да биде платена на рати.
За Олмо се заинтересирани и два клуба од Премиер лигата, како и Баерн (Минхен). Токму поради оваа причина Деко ќе се обиде да го заврши трансферот што е можно поскоро. „Мундо Депортиво“ додава дека има и рок во кој истекува клаузулата во договорот на Шпанецот со „црвените бикови“. Тоа е 15 јули – ден по завршувањето на Европското првенство.
Ситуацијата со Нико Вилијамс е покомплицирана бидејќи Атлетик Билбао ќе сака наеднаш да му биде исплатена целата клаузула од договорот која е 50 милиони евра.