Stellantis брзо реагираше на најавата за воведување повисоки царини на ЕУ за увоз на електрични возила од Кина и започна со производство на моделот Leapmotor T03 mini во Полска. Сепак, целосно сериско производство е закажано за септември, а од следната година во истата фабрика ќе се произведува уште еден модел на кинеската марка.
Производството на Leapmotor во Европа започнува порано од очекуваното. Само минатиот месец, извршниот директор на Stellantis, Карлос Таварес, објави дека полската фабрика, која моментално го произведува Jeep Avenger, се разгледува како производствена база за Leapmotor во Европа.
Stellantis купи 21 отсто од акциите во Leapmotor со седиште во Жеџијанг минатата година, а потоа формираше заедничко вложување наречено Leapmotor International во кое Stellantis има контролен удел од 51 отсто. Според договорот, Stellantis има ексклузивни права за производство, извоз и продажба на производи на Leapmotor надвор од Кина, според Klix.
Трошоците за производство во полската фабрика наводно се од 400 до 500 евра по автомобил, што е слична бројка со трошоците за производство на автомобили во Кина. Сепак, благодарение на долгогодишната фабрика на Fiat, инаку поранешна фабрика за производство на Fiat 500, Stellantis го произведува кинескиот модел по двојно повисока пазарна цена.
Продажбата на Leapmotor во Европа треба да започне во септември, а продажната мрежа треба да достигне 200 дилери до крајот на годината. Плановите предвидуваат најмалку шест модели до 2027 година. Новиот Leapmotor T03 има електричен мотор со 101 коњски сили и батерија која обезбедува автономија од 265 километри.
Со овој модел, Stellantis сака да ги вкрсти копјата со Dacia Spring, мал автомобил кој Renault го произведува во соработка со кинескиот производител Dongfengi. Покрај овој модел, кинеската компанија од следната година ќе го произведува и теренецот А12, исто така во полската фабрика.