Македонско друштво „Илинден“ од Тирана утврди Декларација против резултатите од пописот во Албанија спроведен од 18-ти септември до 30-ти октомври, а во одделни делови продолжен до 16-ти ноември 2023 година. Во Декларацијата стои дека Друштвото ги отфрла прелиминарните пописни резултати поради фалсификат на бројот на етничките Македонци.
-Нема етнички Бугари во Албанија, ниту имало некогаш претходно. Фалсификуван е бројот на етнички Македонци со грубо мешање на бугарската амбасада во Тирана, владата во Софија и неколку фондации од Бугарија, пред и за време на пописот, остро реагираат македонското друштво „Илинден“.
Се посочува дека и покрај постојаното алармирање пред јавноста и институцииите на власта на Албанија, во текот на цела година, за очигледните подготовки за пописен фалсификат, ништо не е сторено.
-Изразуваме жалење и разочараност поради незаинтересираноста на албанската Влада за грубото мешање на Бугарија во внатрешните работи на Албанија со цел денационализација и асимилација на Македонците во областите и местата каде што живеат. Жалиме што албанската Влада не презеде мерки за заштита на правата и слободите на Македонците во Албанија, стои во декларацијата.
Декларацијата, ќе биде доставена до албанскиот Парламент, Владата, претседателот на државата, Државниот институт за статистика и Народниот правобранител, до македонскиот претседател, Собранието и Владата, како и до Европската Унија, Советот на Европа, ОБСЕ, ФУЕН и странските амбасади акредитирани во Албанија.
Македонците и другите национални малцинства во Албанија, не го прифаќаат пописот и бараат нов со меѓународни стандарди на ООН и ЕУ.
Според извештаите на институтот за статистика ИНСТАТ, во Албанија по најновиот попис живеат повеќе Бугари од Македонци. Бројот на попишани Бугари во Албанија изнесува 7.957, додека бројот на Македонци е 2 281. На претпоследниот попис во Албанија во 2011 година биле регистрирани 5.512 Македонци.