Џошуа Зиркзе имаше одлично деби за Манчестер Јунајтед.
Тимот на Ерик тен Хаг го победи Фулам со 1:0 во првиот натпревар од новата сезона од Премиер лигата со голот на Холанѓанецот во 87. минута.
Зиркзе, кој летово пристигна од Болоња за 42,5 милиони евра, на теренот влезе во 61. минута наместо Мејсон Маунт.
И набрзо се покажа дека ќе биде добро засилување, бидејќи првата шанса што му се укажа, на центаршутот на Гарначо, ја претвори во победнички гол.
Разбирлива беше радоста на Зиркзе пред навивачите на „Стретфорд енд“.
„Да победам на мојот прв натпревар дома и да постигнам гол, не можеше да биде подобро. Ми кажаа дека славјето пред „Стретфорд Енд“ е едно од најубавите можни чувства во Манчестер Јунајтед. Благодарен сум што почувствував такво нешто веќе на првиот натпревар. Чувството е неверојатно. На крајот победивме, тоа го посакувавме сите. Не можам да опишам како се чувствувам, прекрасно е. Добро ме примија, ова е одличен тим. Сакаме да постигнеме нешто големо. Неверојатно е, тоа е како сон“, вели Зиркзе.
Тој не беше со тимот на турнејата во САД. Тренираше во Манчестер, се приклучи на остатокот од тимот дури по нивното пристигнување во Англија, па работеше по посебна програма.
„Менаџерот пред да влезам во игра ми рече дека морам да внесам енергија и да му помогнам на тимот што е можно повеќе. Манчестер Јунајтед е голем клуб. Секогаш треба да се стремите кон најдоброто. Тоа вклучува давање сто проценти на дневна основа. Чувствувам добри вибрации“, изјави херојот во победата на „црвените ѓаволи“.
Менаџерот Ерик тен Хаг беше пресреќен по мечот.
„Важно е напаѓачот да постигнува голови. Беше токму таму каде што треба да ја заврши акцијата. Има повеќе квалитет, добар е во соработка со играчите на теренот, па мораме да го најдеме вистинскиот баланс. Мораме да работиме со него за повеќе да стои пред голот и да постигнува голови. Затоа го донесовме. Сето ова покажува колку се важни замените. Одлично е кога внесувате играч и тој придонесува за победа на натпреварот на своето деби. Ова е добро за работниот процес и тимскиот дух. Тоа покажува колку се важни замените, тие мора да бидат подготвени во секое време“, вели Тен Хаг.
Манчестер Јунајтед имаше можност да слави уште поубедливо.
„Против Фулам секогаш е тешко, но добро ги притискавме и ги задржавме на тој начин. Создадовме многу шанси, требаше порано да постигнеме гол. Тоа е мојата единствена критика кон тимот, мора да ги „убиваме“ натпреварите порано“, заклучи менаџерот Манчестер Јунајтед.