Realme ја претстави новата технологија за полнење од 320 W наречена 320W SuperSonic Charge на настан во Шенжен, Кина. Компанијата ја демонстрираше оваа технологија со полнење на паметен телефон со батерија од 4420 mAh за само четири минути и 30 секунди. Ова е моментално најбрзата технологија за полнење на паметни телефони во светот.
Покрај тоа што технологијата SuperSonic Charge од 320 W целосно ја полни батеријата на смартфонот за 4 минути и 30 секунди, таа ја полни до 26% за една минута, а над 50% за помалку од две минути.
Технологијата за полнење од 320 W на Realme е малку побрза од технологијата 300 W на Redmi, која успеа целосно да ја наполни батеријата од 4000 mAh за 4 минути и 55 секунди, пренесува GSMArena.
Realme, исто така, откри дека адаптерот за напојување од 320 W се нарекува Pocket Cannon и е сличен по големина на полначот од 240 W на Realme.
Покрај технологијата SuperSonic Charge од 320 W, Realme претстави и батерија со капацитет од 4420 mAh со четири свиткани ќелии. Секоја ќелија е 3 mm потенка, а овој дизајн овозможува 10% поголем капацитет во споредба со традиционалните батерии. Овој потег ги поттикна шпекулациите дека Realme би можел да лансира уред на преклоп.
На почетокот на минатата година, Realme го претстави GT Neo 5, кој во тоа време беше смартфонот со најбрзо полнење на пазарот, благодарение на неговата способност за полнење од 240 W, што овозможи батеријата од 4600 mAh целосно да се наполни за девет и пол минути.
Според The Verge, помалку од еден месец подоцна, Redmi, друг кинески производител и подружница на Xiaomi, најави технологија за брзо полнење од 300 W, која за време на демонстрацијата успеа целосно да наполни телефон со батерија од 4100 mAh за околу пет минути.
До денес, Redmi ја нема имплементирано својата технологија за полнење од 300W во ниту еден од своите уреди, а слична е ситуацијата со новата технологија на Realme од 320W. Компанијата не откри кој паметен телефон бил користен за време на демонстрацијата, ниту пак објави кога новата технологија SuperSonic Charge и батеријата со четири ќелии би можеле да бидат достапни во идните уреди.