Водечкиот кинески производител на автомобили BYD ги засилува напорите да се прошири надвор од Кина и покрај зголемените царини за кинеските електрични возила на Запад.
Воедно бележи и одлични деловни резултати. Во првото полугодие успеал да ја зголеми добивката за четвртина, а приходите за 16 отсто.
BYD, со седиште во Шенжен и котирана на берзата во Хонг Конг, е најважниот производител на електрични возила во Кина, пренесува француската новинска агенција АФП.
Во првата половина од годинава оствари нето добивка од 1,91 милијарди долари, што е за 24,4 отсто повеќе во однос на истиот период лани. Годишната продажба се зголеми за 15,8 отсто на 42,3 милијарди долари.
Растот се должи на континуираната силна побарувачка за нејзините електрични автомобили дома и во странство.
Кинеските власти планираат до 2035 година продажбата на автомобили во земјата да биде претежно ограничена на електрични и хибридни возила. Во јули, уделот на продажбата на овие возила во втората по големина економија во светот веќе беше повеќе од половина.
Во Кина, продажбата на електрични возила беше лансирана во минатото со субвенции кои истекуваа на крајот на 2022 година.
ЕУ тврди дека кинеските државни субвенции ги ставаат кинеските автомобилски компании во нелојална предност, ја нарушуваат конкуренцијата и штети на конкурентноста на европските производители. Затоа, Брисел воведе привремени дополнителни царини за кинеските електрични возила ова лето. Според ревидираниот августовски предлог тие ќе изнесуваат 36,3 отсто, а во октомври доколку нема договор со Пекинг ќе станат постојани.
Во меѓувреме, во мај САД објавија 100 отсто зголемување на царините за кинеските електрични возила, а истите високи тарифи беа објавени во понеделникот во Канада, каде Кина беше обвинета дека „не игра според истите правила“ во области како што се еколошките стандарди и работа во други земји“.
И покрај ова, BYD ги засилува напорите за проширување во странство и планира да отвори фабрики во Унгарија и Турција.