Министерството за транспорт ги демантира наводите кои се појавија во медиумите дека проектот за автопатот Скопје-Блаце нема да заврши, изјави заменик-министерката Калтрина Зеколи Шаќири.
„Министерот Николовски не изјавил дека проектот нема да заврши. Вистината е дека првиот сегмент од 2 километри веќе е завршен и се очекува да биде отворен за сообраќај во следните два месеца,“ истакна Зеколи Шаќири.
Во однос на преостанатиот дел од автопатот, таа посочи дека Министерството разгледува нов проект за да обезбеди поодржливо и поекономично решение. „Овој повторен проект е неопходен поради погрешниот и нелогичен избор на траса од претходните раководители на Јавното претпријатие за државни патишта, кои избрале планински терен кој е тежок и скап за изградба, без јасни причини,“ додаде Зеколи Шаќири.
Таа нагласи дека од планираните 12 километри, 6 километри биле предвидени за тунели, што го прави проектот исклучително скап. „Со проценета цена од околу 240 милиони евра, односно 20 милиони евра по километар, овој проект е еден од најскапите во регионот,“ потенцира таа.
Во моментов, Министерството разгледува алтернативна траса која ќе биде покрај постојната патека, со цел да се обезбеди полесен пристап за граѓаните и пониска цена на изградба. „Нашата цел е да го завршиме овој проект на ефикасен и економски прифатлив начин, обезбедувајќи модерен и функционален автопат кој ќе ги задоволи потребите на граѓаните и ќе придонесе за развојот на регионот,“ рече Зеколи Шаќири.
Таа ги повика граѓаните и медиумите да се потпрат на точни и верификувани информации за понатамошниот развој на овој важен проект. „Ги покануваме граѓаните и медиумите да ги следат официјалните информации од Министерството за транспорт,“ заврши заменик-министерот.
Калтрина Зеколи Шаќири
Заменик министер на Министерство за Транспорт