Рекламите нè напаѓаат од сите страни, ја прекинуваат нашата ТВ програма, се појавуваат додека гледаме видеа на Интернет, ни го отежнуваат сурфањето на нашите омилени страници. Сега се чини дека тие може да се појават и на инфозабавните екрани на нашите автомобили.
Нов патент на Ford е идеја за систем кој ја користи вашата дестинација, рута, брзина, локација, историја на патување, сообраќај и друго за да го одреди типот на реклама што ќе ви се прикаже на екранот(ите) во возилото.
Производителот на автомобили, исто така, ќе може да процени како корисниците комуницираат со рекламите, кои би можеле да вклучуваат акустични податоци како што се следење разговори во автомобилот, за да „разберат колку добро корисникот толерира одреден број реклами“.
Системот може да го слуша дијалогот помеѓу патниците и да го намали бројот на реклами за време на разговорите или да пушти аудио реклама кога во кабината е тивкo.
Може да слуша и клучни зборови или фрази што укажуваат на дестинацијата на возачот, користејќи ги тие информации со податоци од историјата за прикажување релевантни реклами. Сето ова, признаваме, звучи како кошмар за приватноста на возачот и тешко е да се замисли дека некои сопственици на автомобили би сакале да прифатат или толерираат такво нешто.
Сепак, ние веќе толерираме реклами и еден вид следење на нашите активности на Интернет во замена за бројни бесплатни содржини на Интернет.
Не е јасно какви придобивки би добиле сопствениците на автомобили од овој систем, но силно се сомневаме дека ваквите реклами ќе резултираат со бесплатни или поевтини автомобили. Повеќе изгледа како друга идеја да се заработат пари и да се зголемат и онака големите профити на автомобилските компании.
Но, за да се случи ова, производителите мора прво да ги убедат клиентите дека нешто вакво може да им биде корисно. A тоа ќе биде многу тешко.