Грчкиот премиер Киријакос Мицотакис изјави дека нема да дозволи прекумерните трошоци да го попречат закрепнувањето на неговата земја од долгата финансиска криза. Тој го рече ова на Меѓународниот саем во Солун, каде што шефовите на владите традиционално секој септември ги прикажуваат економските политики за следната година, притоа пофалувајќи ги нивните достигнувања.
Мицотакис најави зголемување на пензиите и минималните плати, како и мерки дизајнирани да го зголемат извозот, да ја подобрат продуктивноста, да помогнат во решавањето на недостигот од станови, да ги охрабрат младите да се држат до земјоделството и да се справат со нискиот наталитет во земјата.
Неколку од овие мерки, како што е вториот круг хипотекарни заеми со ниски камати за млади семејства, во вредност од две милијарди евра, делумно ќе бидат финансирани од Европската унија.
Во врска со растот на туризмот кој некои го критикуваа како прекумерен, Мицотакис рече дека краткорочните изнајмувања на станови не треба да се „демонизираат“, но вети дека нема да дозволи нови во центарот на Атина, најмалку наредните година дена.
Тој најави и повисоки такси за патниците од крузерите кои ќе плаќаат повеќе на островите Миконос и Санторини. Што се однесува до Санторини, владините претставници посочија дека сегашната такса од 35 центи по патник може да се зголеми на меѓу 10 и 15 евра.
Грчкиот лидер истакна дека владата има повеќе од илјада дена до следните парламентарни избори да ја спроведе својата програма и истакна дека неговата партија е единствената стабилизирачка сила во грчката политика.
Секако се соочува со мал предизвик од опозицијата, каде двете најголеми партии Сириза и социјалистичката ПАСОК се оптоварени со нивните внатрешни проблеми и поделби.
Лидерот на Сириза, Стефанос Каселакис се соочува со гласање недоверба на состанокот на централниот комитет на партијата. Социјалистите, пак, се зафатени со борбата за лидерство, во која во октомври ќе се соочат дури седум кандидати.