Екипажот на приватното вселенско летало Polaris Dawn се врати на Земјата по пет дена минати во орбитата, во историски подвиг на првите непрофесионални астронаути кои „прошетаа“ во вселената.
Капсулата Dragon слета на брегот на Флорида нешто по 10 часот по средноевропско време, а настанот го емитуваше SpaceX.
„Потврдено е слетувањето на Dragon. Добре дојдовте назад на Земјата“, објави SpaceX на платформата X, порано позната како Twitter.
Американската вселенска агенција НАСА соопшти дека мисијата претставува „џиновски чекор напред“ за комерцијалната вселенска индустрија.
Кога повторно влегол во атмосферата на Земјата, леталото се приближило до температура од 1.900 степени Целзиусови, предизвикани од силниот притисок и триење при туркањето низ воздухот со брзина од околу 27.000 километри на час.
Четиричлениот цивилен тим, поддржан и предводен од милијардерот Џаред Ајзакман, отпатува подалеку во вселената од кој било човек во повеќе од педесет години, и тој стана првиот непрофесионален астронаут кој отиде во вселената.
Членовите на екипажот влегоа во историјата во четвртокот, 12 септември, како први непрофесионални астронаути што прошетале во вселената.
Мисијата Polaris Dawn, финансирана од Ајзакман во соработка со SpaceX, започна во вторник, 10 септември.
Екипажот успешно се врати на Земјата во недела, 15 септември.
Скот Потет, пензиониран потполковник на Военото воздухопловство на САД, како и Сара Гилис и Ана Менон, експерти вработени во SpaceX, исто така беа на леталото.
„Кога ќе се вратиме дома, ќе имаме многу работа, но оттука Земјата изгледа како совршена планета“, рече Ајзакман по прошетката.
Џаред Ајзакман, пилот и милијардер, основачот на компанијата за електронско плаќање Swift4, покрај ова, го финансираше летот Inspiration4 со Space X во 2021 година.
Ова е уште една голема пресвртница за SpaceX, чиј основач е Илон Маск, која станува моќна компанија која ја менува вселенската индустрија.
Каква беше прошетката?
Овации одекнуваа низ седиштето на SpaceX додека се отвораа вратите на вселенскиот брод.
Дојде долгоочекуваниот момент.
Милијардерот Џаред Ајзакман тргна на првата приватна вселенска прошетка.
„Тоа е прекрасен свет“, рече тој.
Потоа излегоа останатите членови, еден по еден.
Тоа е голем чекор напред за приватното вселенско патување, кое се покажа дека може да се натпреварува или дури и да го надмине јавно финансираното истражување.
Пред неколку децении, само државните вселенски агенции можеа да го направат тоа.
Засега, се чини дека ризичниот потфат на Ајзакман успеа – тој плати за тоа со купување на вселенската мисија на SpaceX.
Милијардерот Илон Маск, кој е сопственик на SpaceX, се надева дека ќе заработи многу повеќе пари од овој бизнис во иднина.
Иако овие моменти се возбудливи, сè уште е далеку од тоа обичните луѓе да можат да си дозволат вселенска прошетка на 435 милји над Земјата.