Европската комисија ќе предложи проширување на постоечката забрана за пушење на отворени простори, според нацртот на предлогот што го добил „Еуроњуз“.
Плановите, кои извршната власт на ЕУ треба да ги усвои денеска, ќе ги прошират сегашните насоки од 2009 година, кои се наменети за намалување на изложеноста на пасивно пушење на јавни места, работни места и во јавниот превоз, пишува порталот „Еуроњуз“.
Европската комисија ќе препорача забрана за пушење на терасите на кафулињата, автобуските станици и зоолошките градини. Најновата верзија на нацртот, која сè уште е подложна на промени, се обидува да ги исчисти јавните простори од сите аеросоли, а не само од чадот од цигарите, така што во забраната ќе бидат вклучени и електронските цигари и вапс.
Упатствата не се правно обврзувачки, но обезбедуваат рамка за земјите-членки да ја следат како дел од пошироките напори за борба против ракот на белите дробови предизвикан од пушењето. Комисијата тврди дека во првите неколку години од спроведувањето, 2009-2012 година веќе има пад на изложеноста.