Корисниците на Apple имаат помала веројатност да купат нови телефони во споредба со корисниците на Android. Новото истражување на CIRP покажува дека околу една третина од сопствениците на iPhone кои купиле нов телефон во изминатата година го користеле претходниот уред најмалку три години.
Кога се споредуваат најновите податоци од 2024 година за тоа колку долго корисниците на iPhone и Android ги чуваат своите телефони со податоци од 2023 година, јасно е дека повеќе сопственици на iPhone подолго ги користат своите уреди, пренесe Apple Insider.
Во 2023 година, околу 29% од корисниците на iPhone ги користеле своите телефони три или повеќе години, додека 21% од корисниците на Android го направиле истото. Во 2024 година, јазот малку се зголеми бидејќи сега една третина од корисниците на iPhone ги користеле своите уреди три или повеќе години.
Во последниве години, Apple повеќе се фокусираше на подобрување на своите уреди отколку на додавање нови, револуционерни функции секоја година. Оваа промена резултираше со производна линија која останува функционална и релевантна подолго време, намалувајќи ја потребата на многу корисници да ги надградуваат уредите.
Дополнително, многу сопственици на iPhone често развиваат приврзаност кон нивните уреди, делумно поради успехот на Apple во градењето лојална база на корисници која се идентификува со брендот.
За многу корисници, iPhone често е повеќе од само телефон – тој е дел од поширок екосистем кој вклучува услуги како iCloud, Apple Music и App Store. Поради оваа врска со уредот и услугите, корисниците ги чуваат своите телефони подолго.
Од друга страна, корисниците на Android почесто ги менуваат своите телефони. Само 21% од сопствениците на Android изјавиле дека користеле ист телефон три или повеќе години, што е забележлива разлика во споредба со корисниците на iPhone.
Извештајот на CIRP покажува дека 57% од телефоните со Android што биле заменети биле стари помалку од две години, додека само една третина од корисниците на iPhone менуваат уреди во тој период. Постојат неколку причини за оваа разлика, а една од најважните е големата разновидност на Android уреди на пазарот.
Телефоните со Android се произведуваат од многу компании, така што корисниците имаат поголем избор на уреди и функции. Поради овој широк избор, корисниците на Android почесто ги надградуваат своите телефони кога ќе излезат нови модели и функции.
Исто така, многу телефони со Android се подостапни од iPhone, што им олеснува на корисниците почесто да купуваат понови модели. Иако има поскапи уреди со Android, многу од нив спаѓаат во средната или пониската ценoвна класа, што заедно со пократкиот животен век поттикнува побрза замена.
Како резултат на тоа, корисниците на Android често се помалку финансиски и емоционално поврзани со своите уреди отколку сопствениците на iPhone, кои имаат тенденција да плаќаат повеќе за своите телефони.