Севернокорејскиот претседател Ким Џонг-ун се закани дека ќе употреби нуклеарно оружје и „трајно ќе ја уништи“ Јужна Кореја доколку биде испровоциран, објавија државните медиуми на земјата.
Тој ја упати заканата откако лидерот на Јужна Кореја предупреди дека режимот на Ким ќе падне доколку се обиде да употреби нуклеарно оружје, пренесува агенцијата Бета, цитирана од АП.
Ваквата реторика меѓу Сеул и Пјонгјанг не е нова, но тензиите се зголемија од почетокот на септември, кога во медиумите беа објавени фотографии од нуклеарен објект во Северна Кореја каде што се збогатува ураниум за нуклеарно оружје. Тоа беше редок поглед на нуклеарната програма на земјата.
Се очекува идната недела севернокорејскиот парламент официјално да го отфрли помирувањето со Јужна Кореја и да ги кодифицира новите национални граници.
За време на посетата на единицата за специјални операции во средата, Ким рече дека неговата војска „нема да се двоуми да ги искористи сите офанзивни сили што и се на располагање, вклучително и нуклеарно оружје“, доколку Јужна Кореја се обиде да ги искористи вооружените сили против суверенитетот на Северна Кореја, објави државната севернокорејска новинска агенција.
„Доколку се појави таква ситуација, продолжувањето на постоењето на Сеул и Република Кореја би било невозможно“, рече Ким, користејќи го официјалното име на Јужна Кореја.