За жал, господинот Филков е само потписник во таа институција, а Министерството го раководи г-ѓа Радица Лазареска Геровска, со која целото министерство нема добра комуникација, вака екс-министерот за правда, Кренар Лога ја започнува својата објава како реакција на неговиот наследник во министерството дека пред да замине од функцијата, Лога си ги зел документите со препораки од Оценската мисија на ЕУ.
Посочува дека во време кога била избрана новата власт, бил на испланиран семеен одмор, за кој се добива решение од Владата.
-Се вратив два дена по неговиот избор, на 26-ти, и неколку пати го барав г. Филков на телефон и преку СМС пораки, а потоа и преку кабинетот. Бев информиран дека тој ќе ме побара, но, за негова несреќа, сè уште е затворен во својот кабинет од својата шефица на кабинетот, која не му дозволува да комуницира.
За трагикомедијата да биде поголема, тој сè уште продолжува да молчи. За сите тие важни теми тој нема став, повторува една банална реченица “и премиерот е право и меѓународните сојузници се у право” се крие од јавноста и чека писмен одговор од г-ѓа Радица, наведува Лога на својот Фејсбук профил.
Екс-министерот е дециден дека писмото од Оценската мисија е добиено по електронски пат, исто како што го добија и екс-вицепремиерот Бојан Маричиќ, претседателот на судски совет Сашко Георгиев и други.
-Еден дел од писмото беше наменет за јавноста, додека другиот беше класифициран само за министерот. Тоа писмо е архивирано од службено лице во Министерството кое ракува со доверливи материјали, но, нормално, Радица не може да го добие додека нема безбедносен сертификат. Истото писмо, со дозвола на мисијата, е споделено и со работната група, односно со претседателот академик Владо Камбовски, додава Лога.
Претходно на прес-конференција, министерот Игор Филков информираше дека документот со препораките од Оценската мисија на Европската комисија бил земен од неговиот претходник. Нагласи дека за ова во тек е постапка и дека ќе се бара одговорност.
-Судскиот совет и Јавното обвинителство мора да бидат ослободени од каква било форма на политичко мешање, функционирајќи единствено во служба на правдата. Овие тела ќе бидат реформирани за да работат со најголем интегритет, фокусирајќи се на професионалноста и строгото почитување на владеење на правото. Голем предизвик во реализација на оваа активност претставува фактот дека Министерството за правда не располага со толку споменуваниот документ со препораките од Оценската мисија на Европската комисија по однос на Судскиот совет. Иако документот е класифицирана информација, истиот бил земен од мојот претходник, заради што Министерството не располага со истиот, појасни Филков.
Како резултат на тоа, тие биле принудени да се потпираат на електронски верзии, само на дел од документот што ги содржи исклучиво препораките без соодветните образложенија и официјалниот допис на Европската комисија.