Менаџерот на Манчестер Јунајтед, Ерик тен Хаг, има намера да ужива во пресметката во Лига Европа со Фенербахче на Жозе Мурињо, наведувајќи го еден од неговите претходници во „црвените ѓаволи“ како „пример за многу, многу менаџери“. Јунајтед патува во Истанбул во четврток во натпревар од третото коло во Лига Европа.
Португалецот Мурињо, кој е на чело на турскиот Фенербахче од летото, беше голема тема на дискусија за време на неговиот престој во Манчестер Јунајтед помеѓу 2016 и 2018 година. Со англискиот тим освои три трофеи, вклучувајќи ја и Лигата на Европа во 2017 година.
„Тоа е навистина голем натпревар за нас двајцата“, рече Тен Хаг на церемонијата на Здружението на фудбалски новинари.
„Навистина уживам да се соочам со него и да играм против него. Тој секогаш има добри тимови. Жозе е победник, освои толку многу трофеи. Мислам дека тој е пример за многу, многу менаџери“, прокоментира холандскиот стручњак.
И покрај тоа што го предводеше Манчестер Јунајтед до триумф во ФА Купот на крајот од минатата сезона, Ерик тен Хаг се врати под притисок по безличен почеток на новата кампања.
„Ова е фудбал, треба да се живее за моментот. Мора да се докажувате секој ден, секоја сезона, така што ние и тимот мора да го направиме тоа. Уште е почеток на сезоната и ќе видиме каде ќе завршиме. Но нашата цел е повторно да освоиме трофеј“, увери Тен Хаг.