Есента ја одбележа популарниот електричен бестселер. Најпродаван автомобил во Европа минатиот месец беше Model Y, со 28.680 продадени примероци, што е изненадувачка бројка по општиот пад за електричните автомобили оваа година. Сепак, Dacia Sandero останува на врвот во вкупната европска продажба оваа година.
Закрепнувањето на пазарот на електрични возила оди многу бавно. И покрај тешкиот период за возилата со батерии, клиентите сепак најмногу и веруваат на Tesla.
Во согласност со таквото расположение, Model Y освен што беше најбараниот електричен автомобил во првиот есенски месец, беше и најпродаваниот модел во Европа во септември. Може да се каже дека тоа беше своевидно враќање на отпишаните, со оглед на тоа дека Model Y минатата година беше најпродаваниот автомобил на европскиот и светскиот пазар.
Така, клиентите регистрирале дури 28.680 примероци од Model Y во септември. Ова е извонреден резултат, со оглед на тоа што на втората позиција во септемвриската продажба, со речиси 8.000 испораки помалку, е Volkswagen Tiguan со испорачани 20.763 примероци, а победничкиот подиум беше комплетиран од Renault Clio со 20.306 продадени примероци.
Севкупниот лидер на овогодинешната продажба во Европа – Dacia Sandero, беше четвртиот најбаран автомобил минатиот месец. Достапниот романски хечбек останува на врвот на вкупната продажба со дури 203.474 продадени примероци, што е зголемување за 16,4 отсто во споредба со истиот период во 2023 година.
Во овој контекст, со разлика од повеќе од 38.000 примероци во однос на VW Golf и повеќе од 41.000 во однос на Renault Clio, главните конкуренти за титулата најпродаван автомобил на крајот на годината, моделот Dacia Sandero има големи шанси да ја заврши 2024 година на првото место на продажните топ листи во Европа. Ако тоа се случи, тоа ќе биде прва година во Европа кога модел на Dacia ја понесе престижната титула бестселер. Дефинитивно ќе дознаеме наскоро.