Централно-десничарската партија ГЕРБ го освои првото место на парламентарните избори во Бугарија, според прелиминарните резултати, но за да формира влада ќе мора да најде коалициски партнер. Според делумното пребројување на гласовите, објавено од Државната изборна комисија, ГЕРБ добила 26,08% од гласовите.
На второ место е партијата „Продолжуваме со промените“ (ПП) со 14,76%, додека ултранационалистичката партија „Препород“ се најде на третото место со 13,8%. Другите партии кои обезбедија пратенички мандати се ДПС – Нов почеток (10,66%), БСП – Обединети леви (7,70%), Сојуз за права и слободи (7,02%), Има таков народ (6,94%), МЕЧ (4,66%) и Величие (4,07%).
Овие избори, седми по ред во последните четири години, се одржаа поради неуспехот на политичките партии да постигнат договор за формирање коалициска влада по изборите на 9-ти јуни. Лидерот на ГЕРБ, Бојко Борисов, поранешен премиер, изрази благодарност до гласачите и најави дека партијата ќе работи на формирање на нова влада, додавајќи дека нема да соработуваат со партијата „Препород“.
Бугарија се соочува со политичка нестабилност од 2020 година, кога бројни протести против корупцијата доведоа до крај на коалициската влада предводена од ГЕРБ. Земјата сега има потреба од стабилна влада за да ги забрза инвестициите од ЕУ во својата застарена инфраструктура и да се подготви за воведувањето на еврото. Плановите за влез во еврозоната веќе беа двапати одложувани поради инфлацијата, а пристапувањето е закажано за 25 јануари 2025 година.
И покрај изборната победа, многумина во земјата стравуваат од понатамошна политичка неизвесност. Дури и ако се формира влада, постои сомнеж дека таа ќе го издржи целиот четиригодишен мандат.