Премиерот Христијан Мицкоски денеска од Приштина изјави дека етнички теми отвораат политичари кои што немаат идеи и каде што има отсуство на реални идеи за реалните потреби на граѓаните. Според Мицкоски, „таквите политичари не знаат како да привлечат внимание и преку политички егзибиционизам се одлучуваат да анимираат публика“.
-Ние сме туика да разговараме за енергетски, транспортни и економски прашања, образование… Тоа е она што не поврзува и треба да додаде квалитет во живот на нашите сограѓани. очекувам во иднина така и да продолжиме да функционираме, рече Мицкоски на заедничката прес-конференција со неговиот косовски колега Албин Курти.
По прашањето за Законот за употребата на јазиците и евентуалната одлука на Уставниот суд, премиерот истакна дека уставните судии во Македонија се избрани од пораненшното мнозинство на СДСМ и ДУИ додека биле на власт. Мицкоски, обраќајќи се и на новинарка од Албанија, кажа:
-Не знам од каде впечатокот дека ние имаме влијание или може сме семоќни и ги контролираме сите партии во Македонија, што не е така. Треба да знаат вашите гледачи дека од првиот до последниот судија се избрани во парламентот кога мнозинство беше СДСМ-ДУИ. Сите оние политичари кои се дел од минатото, не можете да ги слушнете за предлози и реформи во економијата, енергетски проекти, образованието, единствената карта на која ја темелеа својата политичка кариера беше криминал и корупција и етнички конфликти, одговори премиерот.
За отсуството на вицепремиерот и министер за односи со заедниците, Иван Стоилковиќ, Мицкоски вели дека тој „горел од желба да биде во Приштина, но бидејќи ја поместиле владината седница, поради оправдани обврски, не е денеска дел од меѓувладината средба“. Македонскиот премиер информира дека првично меѓувладината седница била закажана за петок 15-ти ноември.
-Затоа неговиот заменик, господинот Неждет Мустафа е тука и имаше прецизна и јасна дискусија со неговиот хомолог од косовската влада, додаде претседателот на македонската влада, одговарајќи на новинарски прашања.
Мицкоски додаде дека „ние како држава и како Влада сме го кажале ставот што е Косово и тоа меѓу првите во светот“.
-Не треба да дозволиме таа тема некој да ја злоупотребува. Ние бевме меѓу првите и сите овие настани се јасна порака од тоа, кажа премиерот од Приштина.