Американската Федерална трговска комисија (FTC) отвори антимонополска истрага против технолошката корпорација Microsoft, која е фокусирана на можното спојување на софтверот на Microsoft за канцелариска продуктивност и безбедност со облак услугите.
Корпорацијата од Редмонд има договори со различни американски владини агенции, вклучувајќи го и Пентагон, а Комисијата, меѓу другото, е загрижена за „грешките на Microsoft во сајбер безбедноста“ и смета дека тие се пример за проблематичната моќ на компанијата врз пазарот, пренесува Bloomberg, повикувајќи се на анонимни информирани извори.
Комисијата го следела Microsoft повеќе од една година, спроведе серија неформални интервјуа со конкурентите и деловните партнери на компанијата и на крајот состави детална листа на прашања на кои Microsoft ќе треба да одговори, додаваат изворите.
Претходниот извештај на Федералната трговска комисија предупреди дека концентрираната природа на пазарот на облак услуги значи дека проблемот во оваа област може да се пренесе и на другите сектори на економијата и на целата глобална економија.
Падот на софтверот Crowdstrike, кој погоди милиони уреди со Windows во јули, покажа како слични нарушувања можат да имаат големо влијание врз глобалната економија, додаде њујоршката агенција.